” گله جك بيزيمدير”ين فيكري تمل لري - علي موتلو

اشاره- ايكي ايلده ن بري “گله جك بيزيمدير” چاتي سي آلتيندا فعاليت گوستره ن و ۱۹ ارديبهشت آذربايجان اؤيرنجي سي گونونو تانيملايان اويرنجي لرين ميلي حركتيميزده اولان رول لاري انصافلي انسانلار طرفينده ن دانيلمازدير. بو چاتي آلتيندا فعاليت گوستره نلر هئچده تصادفي اولاراق بو شعاري سئچمه ميشلر. “گله جك بيزيمدير” چاتي سي آلتيندا فعاليت گوستره نلر هر زامان ميلي حركتيميزين ايچينده بيرليك چاغيريسيندا اولموش، تئوريك موباحيثه لرين بوشلوغونو دولدورماغا چاليشميش و عيني زاماندا حركتيميزي ديكاتوريا و غير دمكراتيك چرچيوه لر ايچينه سوغماغا چاليشانلارين قارشيسيندا ديرنميشدير. بو چاتي كيمسه نين يئريني داراتماق ايسته مه ميش، آنجاق آذربايجان مركزلي دوشونجه سيستمي و آذربايجانين ميللي منافعي و قيرميزي چيزگي لري نين كئشيگينده دورماغي باشارميشدير. تام بيلمه ديگيميز نده نلره گوره بعضي لري بو شعاردان ناراحت اولموشلار. و حتي بعضي لري نه بيزي و نه بيزيم آديميزي گورمك ايسته مه ميشلر. هر حالدا بيزيم آرزوموز گوجلو و واحيد بير آذربايجان اويرنجي حركتي نين شاهيدي اولماق دير. بوتون بو مسئله لري نظره آلاراق گله جك گونلرده اولان توپلانتي لار بيزيم حركتيميزين يولونو بليرله يه جكدير. اورتادا اوچ سناريو گورونمكده دير.

۱- گوجلو و واحيد بير اويرنجي حركاتي ياراناجاق و بيزده اونون ايچينده فعاليت گوستره جه ييك.
۲- رسما فعاليتيميزي دوردوروب و گئري اوتوراجاغيق.
۳- فعاليت دايره سيني بير آز محدود لاشديراراق عيني چاتي آلتيندا فيكري و تئوريك چاليشمالاريميزي، سياسي ائيلملرده ن اوزاق دوام ائتديره جه ييك.

بير باشقا موضوع: سون گونلرده بيلنمه يه ن نده نلر اوزه رينده ن بو چاتي نين رسمي وئبلاگي قاپانما دورومونا گلميشدير ([1] www.oyrenci.mi…). ائله اونا گوره هله ليك يئني سيته يولا دوشه نه قده ر اوزه ل يازي لاريميزين آذربايجان سيته لري طرفينده ن يايلماسي بيزي ممنون ائده جكدير.

” گله جك بيزيمدير”ين فيكري تمل لري

گونئي آذربايجان اويرنجي حركاتي نين اورتايا چيخيشي و گليشيم سوره جي حاققينداكي فيكيرلريميزي داها اونجه كي يازيلاريميزدا اينجه له مه يه چاليشميشديق. بو يازيدا آذربايجان اويرنجي سي نين بو گون منيمسه ديگي و اونون اطرافيندا بيرلشمك ايسته ديگي ” گله جك بيزيمدير” شعاريني آناليز ائتمه يه چاليشاجاييق. آذربايجان اويرنجي حركتي كيم ليك موجادله سي وئره ن بير كوتله سل حركتين پارچاسيني تشكيل ائتمكده دير. بو حركت ميلي حركتين تئوريك و فكري ملزه مه سيني (ابزار) حاضيرلاماقدادير. اولكه ايچري سينده آغير سياسي شرايط نده ني ايله آذربايجان ميلي حركتينين انتلكوتئل ياپي سينين اولماماسي تئوريك يوكو اويرنجي حركتينه يوكله ميشدير. بو ندنله آذربايجان اويرنجي حركتي بير طرفده ن اوز وارليغيني دوام ائتديرمك اوچون سياسي و اجتماعي ائيلم لر گئرچك لشديرمكده، ديگر طرفده ن ده ميلي حركتين احتياجي اولان سياسي ادبياتيني ياراتماغا چاليشماقدادير. اويرنجي حركتي بو ايكي آلانداكي فعاليتيني ائتمك اوچون دوغرو، طرفسيز و گوجلو بير چاتي يا احتياج دويماقدادير. سون ايكي ايلدير اويرنجي حركتي ايچريسينده ن چيخان “گله جك بيزيمدير” چاتي سي بو گونه قده ر بو وظيفه ني خطاسيز اولاراق يئرينه گتيرمه يه چاليشميشدير. آنجاق هله ده ” گله جك بيزيمدير” شعاري بعضي ميللي فعاللار طرفينده ن تانيم سيزدير. بو يازي ” گله جك بيزيمدير” شعارينين فلسفي، تئوريك و استراتژيك تمللريني آچيقلاماغا چاليشاجاقدير. بوندان سونراكي آذربايجان اويرنجي حركتي نين دارتيشمالاريني بو شعار اوزه رينده ن ايره لي گوتوره جه ييك.

فلسفي تملي

“گله جك بيزيمدير” آذربايجان اويرنجي سي اوچون بير وار اولما دوشونجه سي دير. بو وار اولما دوشونجه سي اويرنجي حركتينين اولوشوموندا و داواملي ليغيندا اونملي دير. چونكو هر حركت فلسفي چكيردگيني تشكيل ائده ره ك ايره لي داها دوغرو گوره بيلير. آذربايجان اويرنجي سي ده ان آزي 15 ايل موجادله ده ن سونرا بئله بير فلسفه تملينه احتياج دويموشدور. بو فلسفي تمل حركتين ايچه ريگيني و قورولوش فلسفه سي ني ده گوسترمكده دير. بوتون حركتلر چاليشمالاريني گله جه يه يونه ليك اورتايا قويورلار. پلانلاريني، هدفلريني و هدفه گوتوره جك آراجلاريني گله جه يه دوغرو سئه چه رلر. ” گله جك بيزيمدير” شعاري آذربايجان اويرنجي حركتينين گله جك فلسفه سيني تشكيل ائتمكده دير. آذربايجان اويرنجي سي بو شعار آلتيندا بير طرفده ن گله جه يه كسين اومود گوزو ايله باخماقدا، ديگر طرفده ن ده بو شعاري گئرچكلشديرمك اوچون اوزونو ميلتي قارشيسيندا مسئول حيس ائتمكده دير. بو ندنله “گله جك بيزيمدير” شعاري آذربايجان اويرنجي حركتي اوچون بير ياشام فلسفه سي دير. حركتيني، پلانلاريني، آراجلاريني و ان اونملي سي هدفلريني بو شعارين چرچيوه سينده اولوشدورماغا چاليشير.

تئوريك تمل

تئوريك و يا فيكير يوروتمه گوجو هر حركتين سوره جين بليرلر. شبهه سيز آذربايجان اويرنجي حركتي ده بو گونه قده ر دوام ائتديگي اوچون تئوريك آچيدان بير چوخ سواللارا جواب وئرميشدير. آنجاق ميلي حركت سوره جينده تئوريك بوشلوق اويرنجي حركتين ده ائتگي له ميشدير. بو گون تئوريك آچيدان آذربايجان اويرنجي حركتي ميلي حركتين قايناغي حالينه گلميشدير. آنجاق اويرنجي حركتي اوز ايچينده تئوريك بوشلوقدان يوخسوندور. بونو اويرنجي حركتي ايچريسنده و درگي لرينده آچيق شكيلده گورمكده ييك. “گله جك بيزيمدير” شعاري چرچيوه سينده آذربايجان اويرنجي سي اوزونو فيكري اولاراق يئني ده ن تانيملاما فرصتي الده ائتميشدير. چونكو بو شعارين تئوريك يونو اويرنجي حركتي نين فيكري چرچيوه سيني تانيماقدا اون آدديمي آتميشدير. بو گونه قده ر اويرنجي لر، اويرنجي درگي لري و بعضي سياسي ماهيت ده كي تشكيلاتلار چرچيوه سينده فعاليت گوسترمكده ايديلر. “گله جك بيزيمدير” شعاري ايسه اويرنجي حركتينين ايچينده كي تئوريك بوشلوغا دارتيشما ايمكاني ياراتماقدادير. اويرنجي لر بو شعار چرچيوه سينده فيكري آيريليقلاري بئله موباحثه يه آجيق توتموشلار.

“گله جك بيزيمدير” شعاري آذربايجان اويرنجي سينه اوزونو، حركتيني و فيكري موجادله سيني يئني ده ن تانيملاماقدا يارديمجي اولماغي پلانلاماقدادير. سياسي چكيشمه لرين ائشيگينده گئرچك له شن بو فيكيري دارتيشمالار البته كي آذربايجان اويرنجي سي نين تئوريك ادبياتينين يارديلماسيندا اونملي رول اويناياجاقدير. بيزيم حركتين مهم سورونلاردان بيريسي اولان تئوريك و فيكري مبحث لرين اولماماسيني “گله جك بيزيمدير” شعاري ايچريسينده ان آزا يئنديرمك فيكري ياتماقداير. آذربايجان اويرنجي سينه نه وئرمه لي دير؟ اونون فيكري بازدا نئجه تغذيه اولونماسي ني بو شعار چرچيوه سينده ديرلنديرمك و چوزوم يوللاري آختارماق مومكوندور.

استراتژيك تمل

استراتژي لر و تاكتيك لر حركتلرين گله جه يه يونه ليك پلانلاري نين ساغلام اولماسي اوچون حركتين يولونو بليرله ر. “گله جك بيزيمدير” شعارينين آذربايجان اويرنجي حركتي آچيسيندان بير استراتژيك تملي تشكيل ائتديگي ني دئمه ميز البته كي بعضي ندن لره دايالي دير. “گله جك بيزيمدير” استراتژيك آچيدان نه آنلام ايفاده ائدير؟ اويرنجي و ميلي حركتين استراتژي سي نين بليرلنمه سينده بو شعارين يئري نه دير؟ “گله جك بيزيمدير” شعاري بورادا بير شعاردان چوخ بير حركت پروژه سي دير. بو گونه قده ر اورتايا قويدوغو سياسي آناليزلر و بيانيه لره باخديغيميزدا، شعار اويرنجي حركتينين گله جه يه يونه ليك يول خريطه سينين اوزه تين (چكيده سين) بيزه گوسترير. بو يول خريطه سينده آذربايجان اويرنجي حركتي نين هدفلري نين قيسا و اوزون مدت لي پروژه لر شكلينده گورمكده ييك. بو اصلينده آذربايجان اويرنجي حركتي نين گيزلي بير استراتژي سيني گوسترمكده دير.

سونوج اولاراق:

بوگون آذربايجان اويرنجي حركتي ايچريسنده ساغلام بير ياپي نين اولوشومونو گورمكده ييك. بو حركت آذربايجان اويرنجي سي حركتي ني صاحيب لنمه فيكرينده دئيل دير. چونكو آذربايجان اويرنجي حركتي بوتون آذربايجانلي اويرنجي لري نين قاتيلي مي ايله اورتايا چيخا بيله ر. بو ندنله بو حركت اوزونو “گله جك بيزيمدير” شعاري آلتيندا تانيملاماق ايسته مك ده دير. اويرنجي حركتي نين سياسي ائيلم لرده ن اوزاق باغيمسيز بير شكيلده فعاليت ائتمه سيني ساوونماقدادير(مودافعه ائدير). بو چاتي اويرنجي حركتي نين انحرافا چكيلمه سي قارشيسيندا ديره نيش گوستره جكدير. “گله جك بيزيمدير” چاتي سي آلتيندا فعاليت گوستره ن اويرنجي لر، اويرنجي حركتي نين باشاري لي و وئريملي اولماسي ني آرزو ائتمكده ديرلر.

بو موضوع حاققيندا فيكير و يازي لارينيزي [2] oyrenci_gunu@yahoo.com آدرئسينه گونده ره بيله رسينيز.

گله جك بيزيمدير
گونئي آذربايجان
۵ تير ۱۳۸۶

http://www.11007.baybak.com/?p=1532

 

نوشته شده در جمعه 8 مهر 1390ساعت 03:09 توسط biz turkuz| 0باخیش