گونئي آذربايجان توركلري خاريجده هله ده “فارس” و “ايران-لي” كيمي تانينير ٫ عبدالله امير هاشمي ايله موصاحيبه (گ.ا.ك صدري)

ع.جاوانشير: “تئررورچولوغا قارشي موباريزه تهران و ايروان-داكي حاكيميتلري ده اهاته ائتمه ليدير”

دانيشيق: س.صدرالدين

بو گونلرده باكي-دا آذربايجان-توركييه دياسپور تشكيلاتلاري نين فورومو كئچيريلدي. تدبيرده [1] گ.ا.ك (گونئي آذربايجان كنگره سي)-ين صدري عبدالله امير هاشمي (جاوانشير) ده ايشتيراك ائديب. او حاضيردا ايسوئچ-ين استكهلم شهرينده ياشايير، اورادا ايبتيدائي مكتبده ۵ ايله ياخيندير كي رياضيات موعليمي ايشله يير. بو گونئيلي سويداشيميزلا بير سيرا مسئله لر باره ده صؤحبت ائديريك.

- جاوانشير بئي، فوروم هاقدا تصوراتينيزي بيلمك ايسترديك.

- بئله بير فورومون كئچيريلمه سي ضروري ايدي. تورك دونياسينا، او جومله دن آذربايجانا قارشي دوشمن قوووه لرين فعال اولدوغو بير دؤورده آذربايجان و توركييه درنكلري نين امكداشليغي نين تمين ائديلمه سي ايستيقامتينده آدديملارين آتيلماسي خوصوصي اهميت داشييير. فورومدان گؤزله ديگيميز اوغورلو نتيجه لر الده ائتمكله ياناشي، قارشيليقلي گؤروشلرين كئچيريلمه سيني، بيرگه امكداشليق كونسئپسيياسي نين حاضيرلانماسيني، بير سؤزله، آنتي آذربايجان، آنتي توركييه قوووه لرينه قارشي بيرگه قوووه نوماييش ائديلمه سيني ايسته ييريك. آذربايجان، توركييه و شيمالي كيپر تورك رئسپوبليكاسي نين رسميلري نين ده چيخيشلاريندا بو مسئله لر وورغولاندي. تبيي كي، ان بؤيوك ايستگيميز دئييلنلرين گئرچكلشمه سيدير.

- دياسپور تشكيلاتلاري نين اوولكي ايللرله موقاييسه ده فاليتيني نئجه ديرلنديريرسينيز؟

- سون بير ۲ ايلده دياسپور تشكيلاتلاري نين فعالليغي نين آرتديغيني سؤيله يه بيلرم. بونا اؤرنك كيمي، ۲۰۰۷-اينجي ايلين فوريه آييندا خوجالي سويقيريمينا هسر ائديلميش چوخسايلي تدبيرلري گؤسترمك اولار. واشنگتن، لندن، استكهلم، هؤتئبورق، استراسبورق، نيويورك، كؤلن و دونيانين بير چوخ يئرلرينده هم كميت، هم ده كئيفيت جهتدن اولكي ايللرله موقاييسه ده سويييه لي تدبيرلر كئچيريلدي. لاكين بو يئترلي دئييل. هله كي غربين ايجتيماعي فيكرينده پروبلئملريميز هاقدا يئترينجه راي ياراتماميشيق. بو ايستيقامتده فعاليتي داها دا گوجلنديرمه لييك.

- تورك دونياسي نين، او جومله دن آذربايجان-ين اساس پروبلئملريندن بيري گونئي آذربايجان توركلري نين ميللي هاقلارينا يييلنمه سي مسئله سيدير. دياسپور بو مسئله ني بين الخالق ايجتيماعيتين ديقتينه چاتديرا بيليرمي؟

- توركييه نين و آذربايجان رئسپوبليكاسي نين ايران-لا دؤولتلرآراسي موناسيبتلري نظره آلينديغيندان فورومدا بو مسئله يه هئچ توخونولمادي. آما بو ساهه ده خاريجده كي تشكيلاتلاريميز بير سيرا آدديملار آتماقدادير. آذربايجان دياسپورونون نوماينده لري سون ايللرده بين الخالق هوقوق مودافيعه سي تشكيلاتلاري، اولدوقلاري اؤلكه لرين پارلامئنتلري ايله سوركلي ايشليه رك گونئي آذربايجان پروبلئميني اونلارين ديقتينه چاتديريرلار. بوندان باشقا، دونيانين آپاريجي دؤولتلري نين خاريجي ايشلر نازيرليكلري ايله ده باجارديغيميز قدر موناسيبت قورماغا چاليشيريق. لاكين اينسان هوقوقلاريني مودافيعه ائدن، ياخود بو ايستيقامتده چاليشان بير سيرا بين الخالق قوروملار بيزه بللي اولمايان سببلردن گونئي آذربايجان مسئله سينه اؤنم وئرمك ايستمير. ياخود پروبلئمين هللي ايله باغلي “آذربايجان خالقي داها فعال اولماليدير” - دئييرلر.

امكداشليق ائتديگيميز قوروملارلا آپاريلان دانيشيقلار، يازيشمالار باره سينده خبرلر زامان-زامان كوتلوي اينفورماسييا واسيطه لرينده ده ياييلير. بونا اؤرنك اولاراق بين الخالق عفو تشكيلاتي، بمت- نين اينسان هوقوقلاري كوميسسارليغي، يونسكو-نون بين الخالق آنا ديلي قورومو ايله امكداشليغيميزي گؤستره بيلريك.

- ياخين و اورتا شرقده كي وضعيتي قيساجا اولاراق شرح ائدردينيز. ائلجه ده بؤلگه ده باش وئرنلر ايران-ين دئموكراتيكلشمه سينه و آذربايجان توركلري نين ميللي هاقلاري نين تمين اولونماسينا نه كيمي تاثير گؤستره بيلر؟

- افقانيستان-دا “طاليبان” اين، عراق-دا صدام حسين-ين دئوريلمه سي، بين الخالق تئررورچولوغا قارشي موباريزه ده آتيلان آدديملار دئموكراتيكلشمه موحيطي نين يارانماسينا يارديم ائدير. بو آدديملار بؤلگه ده كي بوتون تئررورچولوغو و تجاووزو، ائلجه ده ترققييه، صولحه، سابيتلييه، اينسان هاقلارينا قارشي اولان بوتون قوووه لري و حاكيميتلري، او جومله دن ايران و ائرمنيستاني دا اهاته ائتمه ليدير.

تأسوفلر اولسون كي، سيويليزاسييانين اينكيشافينا مانع اولان تهران و ايروانداكي رئژيملره بو هله چاتماييب. وضعيتين بو شكيلده قالماسي دئموكراتيك دونيانين گئرچكلشديرمك ايسته ديگي ايدئيالارين درين بؤهرانلا اوزلشمه سينه تاثير گؤستره بيلر. عراق-دا دئموكراتيكلشمه پروسئسي نين لنگ گئتمه سيني بونا اؤرنك گؤسترمك اولار. اگر عراق-دا باش وئرميش اولايلار ايران-دا دا تكرارلانارسا، او زامان حاديثه لرين سونوجونو پروقنوزلاشديرماق چتين اولاجاق. بونون قارشيسيني آلماق اوچون بؤلگه ده كي دئموكراتيك قوووه لر، هابئله همين اراضيده ماراقلي اولان گوجلر يئرلي ميلتلرين منافعيي نين تمين ائديلمه سيني نظره آلاراق بيرگه فاليت گؤسترمه ليدير. گونئي آذربايجان-ا گلديكده ايسه بو ايستيقامتده آدديم آتماق اوچون ميللي هركات فاللاري نين اوزرينه داها بؤيوك مسئوليت دوشور.

- مسئله ني بير قدر آچيقلاياق. مثلا، آمريكا، ياخود اسرائيل ايران-ا احتيمال اولونان هوجومو گئرچكلشديررسه، بونون زياني، يوخسا خئيري چوخ اولار؟

- بو هاقدا پروقنوز وئرمك چتيندير. آما هر ايكي طرف ائله تبليغات آپارير كي، سانكي قارشيدورمايا حاضيرديرلار. آنجاق بونون آغير نتيجه سيني بؤلگه ده كي دينج اهالي چكه جك. سياسي، ايجتيماعي، ميللي و ايقتيصادي باخيمدان فايدا وئره جكمي؟ منجه، تام معنادا يوخ. هرطرفلي تكامولو، اينكيشافي، ترققيني، ديرچه ليشي داها چوخ دينج شرايطده الده ائتمك مومكوندور. بو باخيمدان ساواش خاراباليقلار، كؤچكونلوك، زوراكيليق و.س. (و سايره) يارادير.

تجروبه ثبوت ائديب كي، زوراكي اوسوللا دئموكراتييا برقرار اولماماقلا ياناشي، او چوخ زامان بو مئتودولوژييانين قورباني اولور.

- ياشاديغينيز اؤلكه ده سيزي ايران-لي، يوخسا آذربايجان-لي كيمي تانيييرلار؟

- سون ۱۵ ايله دك آذربايجان آدينا قوروملار، درگي، قزئت و.س. رسمي قئيدياتدان كئچمه ديگيندن گونئي آذربايجان-ليلاري ايران-لي كيمي تانيماقلا برابر فيكيرلرده فارس تكي آنلانيردي. آما زامان اؤتدوكجه جمعيتلر ياراندي، رسمي قئيدياتدان كئچدي، آذربايجان آدينا ميللي-مدني تدبيرلر تشكيل اولوندو، ميللي پروبلئملرله باغلي چئشيدلي موراجيعتلر ائديلدي. بو كيمي فعاليت نتيجه سينده اوللر ايران-لي كيمي تانينانلاري ايندي آذربايجان توركو كيمي تانيماغا باشلاييرلار. بو اؤزونو اؤلكه ده چيخان كيو (KİV)-ده و ياييملانان تلويزيوندا، راديودا دا گؤسترير. آما تأسوفلر اولسون كي، بيزيم آذربايجان توركو كيمي تانينماميز كوتلوي حال آلماييب. بونون سببلريندن بيري سويداشلاريميزين ميللي كيمليگي ايله باغلي شوورلارينداكي ناقيضليكدير. ائلجه ده، ياشاديقلاري اؤلكه ده رسمي سندلرده “ايران-لي” يازيلديغيندان اونلاري بئله ده آدلانديريرلار.

- بير نئچه كلمه ده گونئي آذربايجان كنگره سي نين يارانما ضرورتي باره ده معلومات وئرردينيز.

- بو، گونئي آذربايجان-ا عايد گوجلو بير ايجتيماعي-سياسي تشكيلاتين اولماماسي ضرورتيندن ياراندي. بونون ايندييه دهك يارانماماسي نين بير چوخ سببلري وار. اؤتن ايللرده ايران-دا ده ييشيلميش حاكيميتلر، شاه و خميني رئژيملري آذربايجان-ليلارا اؤز ميللي هاقلاريني طلب ائدن تشكيلات ياراتماغا ايمكان وئرمه ييب. سون بير ايلده، خوصوصيله اؤتن ايل مي-اين ۲۲-سيندن باشلاياراق كئچيريلميش اعتيراض آكسييالاري گئرچكده خالقيميزين ديكتاتورلوغا قارشي اعتيناسيزليغيني اورتايا چيخاردي. بو گون جراتله دئمك اولار كي، گونئي آذربايجان-دا اينسانلاريميز ميللي هاقلارلا باغلي آچيق-آشكار فيكير سؤيله مه يه و اونون تميني اوغروندا موباريزه آپارماغا حاضيرديرلار. بو گون اونلارين ميللي هاقلاري نين طلبي اطرافيندا تشكيلاتلانماسي ضروريدير. بو باخيمدان بيز ده همين يؤنده فعاليت گؤسترمه يه چاليشيريق. ۲۰۰۶-اينجي ايلين مارچ-ايندا تاسيس ييغينجاغيميز كئچيريليب. همين ايلين اوگوست-وندا ايسه تشكيلاتيميزي ائلان ائتميشيك. قوروموموزون مركزي اروپادا يئرلشير، ۸ اؤلكه ده تمثيلچيميز وار. “كنگرس (Konqres)” آدلي متبوع اورقانيميز چيخير. اينترنت سايتيميز ايسه [2] www.guneyazerb… دور.

فورصتدن ايستيفاده ائده رك بوتون سويداشلاريميزي قارشيدان گلن نووروز بايرامي موناسيبتي ايله تبريك ائدير، ميلتيميزه خوش گونلر و فيراوانليق آرزولاييرام.

گونئي آذربايجان كنگره سي (گ.ا.ك٫ GAK) هاقدا قيسا معلومات:

[1] گ.ا.ك (GAK)-اين آلمان، بريتانيا، فرانسه، ايسوئچ (سوئد)، نوروژ، روسيه، توركييه و باشقا اؤلكه لرده تمثيلچيلري فعاليت گؤسترير.
تشكيلاتين مرامنامه سيندن بعضي مودعالاري ديقتينيزه چاتديريريق.
…گونئي آذربايجان-دا اينسان هاقلاري نين قورونماسي اوغروندا آرديجيل موباريزه آپارماق؛
- ميللي عادت-عنعنه لرين، مدنيتين، تفككورون قورونوب-ساخلانيلماسي، تبليغي ايستيقامتينده فعاليت گؤسترمك؛
- اينسان هاقلاري نين عاليليگي پرينسيپلريني، بمت نيظامنامه سيني اساس گؤتوره رك ايرانين اسارتي آلتيندا اولان ۳۵ ميليوندان چوخ آذربايجان توركونون مدني، ايقتيصادي، ايجتيماعي-سياسي هوقوقلاري اوغروندا موباريزه آپارماق؛
- گونئي آذربايجان توركلري نين ميللي هاقلاري نين پوزولدوغونو سندلرله سوبوت ائتمك؛
- خالقلارين و ميلتلرين اؤز موقددراتيني تمين ائتمك هوقوقونا اساسلاناراق آذربايجان توركلري نين اراضي و دؤولت قورولوشونون تعيين ائديلمه سي هوقوقلاري نين اونلارا وئريلمه سينه نايل اولماق؛
- گونئي آذربايجان-دا فارس رئژيمي طرفيندن آذربايجان توركلري نين هوقوقلاري نين كوتلوي شكيلده پوزولماسي فاكتيني بين الخالق تشكيلاتلارا و دونيا دؤولتلرينه داعواملي اولاراق چاتديرماق؛
- گونئي آذربايجان-دا تاريخي، ميللي آبيده لرين حاكيميت طرفيندن سيرادان چيخاريلماسي و فارس-لاشديريلماسي هاقدا يونسكو قارشيسيندا مسئله قالديرماق؛
- گونئي آذربايجان-دا ميللي آزادليق اوغروندا موباريزه آپاران تشكيلاتلاري دستكله مك و اونلاري بين الخالق عالمده تانيتماق؛
- …قاراباغ و اطراف رايونلارين ايشغالدان آزاد اولونماسيني طلب ائتمك، بو يولدا ائرمنيستان طرفيندن ايشغال ائديلميش آذربايجان تورپاقلاري نين گئري قايتاريلماسي اوغروندا موباريزه آپارماق.

بو دانيشيق آينا سايتيندان آلينيب و اؤزل اولاراق [4] باي بك اؤچون لاتيندن چئوريليبدير)

——————————————————————————–

[1] گ.ا.ك: http://www.guneyazerbaycankonqresi.com/
[2] www.guneyazerb…: http://www.guneyazerbaycankonqresi.com/
[3] گ.ا.ك: http://www.guneyazerbaycankonqresi.com/
[4] باي بك: http://www.baybak.com/

——————————————————————————–

http://www.baybak.com/Baybak/?p=5250

 

نوشته شده در جمعه 8 مهر 1390ساعت 03:09 توسط biz turkuz| 0باخیش