ايراندا ديكتاتورلوغون دؤرد اصلي ستونو - رسول ماماغانلي

غرب اؤلكه لرينده دمكراتيك سياسي سيستئملرين گليشمه سي٬ بورژوازي نين آياق توتوب گوجلنمه سي ايله يان-يانا گليشميش و اوزون بير مدت ايچينده بوگونكو شكليني تاپميشدير. اينگلتره بير كلاسيك نمونه اولاراق گؤسترير كي نئجه خصوصي گيريشيمچيلر صنعتي لشمه نين ايبتيكارين الده ائديب و اونونلا ياناشي سياسي ياپي و قوروملاردا دا سؤز صاحيبي اولماغا چاليشيبلار. البته كي < انگليس يولو> باشقا اؤلكه لرده تقليد اولونماييب و غرب اؤلكه لري اؤزلرينه خاص يولدا ايلرله ميشلر. اگر بيز انكشاف سورجينده اينجه ليكلري بير قيراغا بوراخساق٬ ايكي آنا يول اوراتايا چيخار: يوخاريينين تشبوثيله گليشن اؤلكه لر( آلمان- روس-ژاپن و…) و آشاغينين گيريشيميله صنعتي لشمه و دموكراسي يولونو توتان اؤلكه لر( اينگلتره- شمالي آمريكا- فرانس- هلند و …)

گؤرونور كي خالقين تشبوثوايله صنعتي لشن اؤلكه لرده دموكراتيك سيستئم دوغال بير مادي بينؤوره يه صاحبدير يعني : خصوصي موتشبثلر صينيفي نين اولوشدوردوغو بينؤوره . بو تاريخي تثبيت٬ بو گون واراولان دموكراسي لاردا باشقا فاكتورلارين پايي يوخموش و ياخود فرعي ايميش آنلامينا گلمز. نئجه كي صنعتي لشمه نين و اونونلا ياني سيرا (موازي) دمكراتيك سورجين گليشمه سينده ان باشدا گلن موثر فاكتلاردان بيري ايشچي صينيفي اولموشدور. سؤزون قيساسي بو ايكي طبقه يعني بورژوازي و ايشچي طبقه سي غرب دموكراسي ديناميزمي نين ايكي آنا ماددي محركه سي دير. قئيد ائتمگه گرك يوخ كي بو آلت ياپيسال ائتگنلرين ( زيربنائي عامللر) يانيندا اوست ياپبيسال ائتگنلرده (روبنائي عامللر) مثلا دين٬ پوزيتيو علملر٬ فلسفه٬ ايدئولوژيلر و… اؤز معين ايزلريني بو پرسه ده بوراخميشدير. بو يازيدا منيم هدفيم غرب دمكراسيسينين انكشاف يوللاريني آناليز ائتمك دئگيل. يالنيز بير قيسسا مقدمه دن سونرا ايران مسئله سينه گؤز آتماقدير.

ايراندا ديكتاتورلوغون دؤرد اصلي ستونو:

۱- ايقتيصادي ائتگنلر:

- ايران دولتينين گلير قايناغي وطنداشلارين وئرديگي وئرگيلر دئگيل.

- دولتين گليري اساسدا نفت پولي ايله تامين اولور.

- مملكتين بؤيوك سرمايه لري دولت انحصاريندا توتولور: نفت٬ بانكلار٬ بؤيوك فابريكلر٬ معدنلر وغيره…

- ايران بورژوازي سي دولتين مستقيم و يا غير مسقيم كؤمكي اولمادان اؤز آياغي اوسته دورا بيلمز.

- خصوصي سرمايه صاحبلري راحات پول قازانمانين يولونو مركزي دولتين مادي و حقوقي حمايتي آلتيندا اولدوغوندا گؤرور.

- مشروطه انقلابيندان بري٬ بللي اولان داخلي و خارجي سببلردن دولايي ايران ايشچي طبقه سي اجتماعي گليشمه پرسئسينده اشتراك ائده بيلمه ميشدير.

۲- سياسي و اداري ائتگنلر:

- مركزي دولت٬ مملكتين اداره سيني موطلق بير شكيلده اؤز اينحيصاريندا توتور. وطنداش هر خيردا بير ايش ايچون تهرانا گئتمه لي دير…

- جدي سياسي پارتيلير٬ سنديكالار و غير دولتي تشكيلاتلار موجود دئگيل.

- بؤلگه سل (منطقه اي) اداري ارگانلار- محله٬ كند٬ شهر٬ ولايت- يوخدور.

- مركزي دولت اورگانلارينين اوزانتيسي اولان اداري/ نظامي اورگانلار ايرانين هر اوچ - بوجاغيندا خالقين قانين شوشويه توتور.

۳- نظامي/ حربي گوجلر

- بوتون سيلاحلي گوجلر: ارتش٬ سپاه٬ پليس٬ ژاندارمري مركزي دولت الينده توتولور.

- هر بير محله ده٬ كندده٬ دانشگاهدا و فابريكده بير بسيج تشكيلاتي وار.

۴- ايدئولوژيك/فرهنگي ائتگنلر:

- شيعه مذهبي دولتين رسمي ديني اولاراق باشقا دينلري و غيري شيعي دوشونجه لري و شيعه مذهبيندن اولمايان وطنداشلاري باسقي آلتيندا توتور. ايرانين حقوقي سيستمي شريعت قانونلاري اساسيندا قورولموش و ايجرا اولونور: قادين داشلاما٬ ال كسمه٬ گؤز چيخارتما٬ خياوانلاردا مينلرجه اينساني دارا چكمه بو ديني ايدئولوژيك سياسي سيستمين چيركين اوزودور. دينه دايالي رژيم خالقين ياشامينين هر يئرنه دخالت ائدير : بسلنمه٬ گئييم٬ گزمك٬ تحصيل٬ عبادت٬ائيلنمك٬ طوي٬ ياس…

ـ فارس ديلي مركزي دولتين انحصاريندا اولان موثر فرهنگي عامل دير. ايرانين مركزي ديكتاتورلوق سيستمينين اولوشوموندا بلكه ده بيرينجي يئري توتان فارس ديليدير. پهلوي ديكتاتورلوغو اساسا فارس عونصورو هژمونياسي تملينده قورولموشدور. رضا شاه هر كندده بير ژاندارما پاسگاهي و اونون يانيندا دا بير فارس مدرسه سي آچديرميشدير. فارس ديلي يوخاريدان ايران خالقلارينا زورلا تحميل اولان بوركراسينين ديليدير. تعجب ائتمه مه لي دير كي فارسجانين فولكولوري يوخدور. فارسجا دولت وبوركراسي ديلي اولاراق يالنيز ايرانين بويوك شهرلرينده بللي بير صينيفلار طرفيندن ايستيفاده اولونوب و پهلويلر حكومتي مدتينجه آسيميلاسيون وسيله سي كيمي مركز ي دولتين ديكتاتوروغونون خدمتينده ايشلتيلميشدير. اسلامي/فاشيست حاكميت ده بو وسيله دن سون درجه يارارلانيب و قيسسا بير مودتده ميليونلارجا غير فارسي فارسلاشديريب واونلاري آنا ديللرينه بيگانه ائتميشدير. بوگون ايش ائله بير يئره گليب چاتيب كي توركلرين بير چوخي اؤ اصللرين انكار ائدير.

نتيجه : يوخاريدا سؤزو گئدن عاميللرين (ائورنسل اينسان حاقلاري چرچواسيندا) كؤكدن دگيشيلمه مه سي هر هانسي بير دورومدا٬ ايراندا دموكراسينين يئرلشمه سي مومكون اولماياجاق

……………………………………

ماماغان وئبلاگيندان

 

 

نوشته شده در جمعه 8 مهر 1390ساعت 04:44 توسط biz turkuz| 1باخیش